Оқу-тәрбие үрдісі

Батыс Қазақстан инженерлік-технологиялық колледжінде
Серпін-2050, «Мәңгілік Ел жастары – индустрияға!»
әлеуметтік жобасы негізінде білім алушлармен жүргізілетін  оқу-тәрбие үрдісі
туралы мәлімет

          Бүгінгі елдің ертеңі жастарға байланысты десек, жастарды оқытумен тәрбиелеуде оқу орнының алар орны ерекше. Бүгінгі студент жастар  –  кешегі мектеп оқушылары, ал ертеңгі мемлекет басқарудың тұтқасын өз қолдарына алатын болашақ мамандар. Сондықтан болашақта білікті бәсекеге қабілетті маман даярлау – өте күрделі және өте жауапкершілігі мол іс-әрекет. Оқушы тек сапалы білім ғана емес, сонымен бірге жоғары деңгейдегі саналы тәрбие үлгілерін де оқу орны қабырғасынан көреді.

Арнаулы орта оқу орындарын да оқу-тәрбие жұмысы – кәсіби бағдар беру, кәсіпке бейімдеу, кәсіптің қыр-сырына үңілдіру арқылы адамзаттық және ұлттық құндылықтарды ұштастыра отырып болашақ маманның базалық (тірек) мәдениетін қалыптастыруды көздейді.

        Бүгінде Батыс Қазақстан облысында осындай студент жастарға әрдайым қолдау көрсетіп, бүгінгі күн талабына сай, бәсекеге қабілетті маман даярлап келе жатқан техникалық және кәсіптік білім беру ұйымдарының арасындағы алдыңғы қатарлы оқу орындарының бірі – Батыс Қазақстан инженерлік-технологиялық колледжінде де тәрбие жұмысы бір жолға қойылып, жүйелі түрде іске асырылып келеді.

     Елбасымыз Н.Ә. Назарбаевтың бастамасымен 2014 жылы Серпін-2050, «Мәңгілік Ел жастары – индустрияға!» әлеуметтік жобасы қолға алынып еліміздің Алматы, Жамбыл, Оңтүстік Қазақстан, Қызылорда, Маңғыстау облыстарынан, Солтүстік Қазақстан, Шығыс Қазақстан, Батыс Қазақстан облысы, Ақтөбе, Атырау облыстарының жоғары және арнаулы орта оқу орындарына талапкерлер оқуға қабылданған болатын.

     Серпін-2050, «Мәңгілік Ел жастары – индустрияға!» әлеуметтік жобасының негізгі міндеттерінің бірі - жастардың техникалыө-кәсіптік мамандық алуына көмектесу, оларды жоғары жалақылы жұмыспен қамтамасыз ету, жастарды адал еңбекке ынталандырудың жолын табу болып табылады.

    Батыс Қазақстан инженерлік-технологиялық колледжі аталған жоба негізінде өткен 2014-2015 оқу жылы Серпін-2050, «Мәңгілік Ел жастары – индустрияға!» әлеуметтік жобасы негізінде 2 мамандық (Ветеринария-20 және Балық шаруашылығы-25) бойынша 45 талапкерді Қызылорда және Маңғыстау облыстарынан оқуға  қабылдаса 2015-2016 оқу жылы колледжге  4 мамандық бойынша 100 талапкер (Ветеринария-25, Мұнай және газ кен орындарын пайдалану - 25, Электрмен қамтамасыз ету – 25, Автомобиль көлігіне қызмет көрсету, жөндеу және пайдалану - 25) 2016-2017 оқу жылы 3 мамандық бойынша 75 талапкер (Электрмен қамтамасыз ету – 25, Тасымалдауды ұйымдастыру және көліктегі қозғалысты басқару – 25, Есептеу техникасы және бағдарламалық қамтамасыз ету-25) оқуға қабылданды.

         Жоба аясында бәсекеге қабілетті маман даярлау мақсатында колледжде «Ветеринария» және «Тасымалдауды ұйымдастыру және көліктегі қозғалысты басқару» мамандығы бойынша білім алушы жоба қатысушылары, бүгінде оқытудың заманауи үлгісі саналатын дуалды оқыту жүйесі негізінде білім алуда.

         Қазіргі таңда колледжде апалы біліммен қатар саналы тәрбие беру ісі де бір жолға қойылған. Мәселен, жоба қатысушылары оқуға қабылданғаннан бері колледжішілік және облыстық ұйымдастырылған мәдени қоғамдық шараларға жиі қатыстырылып, олардың жан-жақты дамуына, үлкен мүмкіндіктер жасалып келеді.

        Сондықтан «Серпін-2050» жобасының мақсаты елімізге қажетті бәсекеге қабілетті мамандар даярлап шығу болса, бұл жолда жоба қатысушылары талпыныспен еңбектеніп, білім алып, алдыңғы қатарлардан көрініп келеді.

        Колледжде жоба қатысушыларының демалысы мен бос уақытын тиімді өткізуі үшін колледжде барлық жағдай жасалған. Колледждегі студент жастардың бос уақыттарын мазмұнды өткізу үшін жоспарлы мәдени, спорттық шаралар ұйымдастырылып келеді. Мысалы, колледжде дәстүрлі «Бірінші курс байқауы», «Жігіт сұлтаны»,  «Колледж аруы», өнер фестивальдері, кездесу кештері, дәстүрлі спартакиадалар т.б. студенттердің ең асыға күтетін шаралары өткізіліп отырады. Сондай-ақ колледждің кiтапхана қоры талапқа сай қажетті әдебиеттермен қамтамасыз етілген. Сабақтан тыс уақытта студенттер көбіне уақытын кітапханада өткізіп, басқа уақыттарда театрға, музейге, басқа да мәдени орындарға барып отырады.

Колледжде студенттердің өзін-өзі басқаруы жүйелі жолға қойылған. Мәселен, студенттердің өзін-өзі басқару ұйымы, колледж жанындағы «Ғасыр» жастар қоғамдық бірлестігі –  студенттердің өзін-өзі басқару жүйесін және студенттердің бос уақытта спорттық және мәдени әрекеттермен қамтамасыз етуін, студенттерге әлеуметтік-психологиялық қолдау көрсету шараларымен айналысады. Сонымен қатар колледждің белсенді оқушыларымен, «Серпін-2050» жоба қатысушыларынан құралған «Ғасыр» жастар қоғамдық бірлестігі облыстық деңгейде көптеген іс-шараларды жүзеге асырып, облысымыздағы ең белсенді ұйымдардың бірі саналады. Осы белсенді жұмыстың нәтижесінде «Ғасыр» жастар қоғамдық бірлестігі, Батыс Қазақстан облысы жастар сыйлығы байқауының «Үздік жастар ұйымы» аталымы бойынша  жеңімпаз болып, 2014 жылдың үздігі атанып, бүгінде облысымыздың белсенді жастар ұйымдарының бірі саналады.

        Адам баласымен бірге жасасып, бірге өмір сүріп келе жатқан қоғамның қажетті және тұрақты функциясының бірі –  тәрбие болып табылады. Осы тәрбиені болашақ оқушы жастардың бойына сіңіру, олардың тұлға болып қалыптасуына, жақсы маман иесі болып шығуына пайдалану болашағымызға деген жарқын жол болмақ. Ендеше, арнайы бағдарламамен келіп, өңірімізде білім алып жатырған серпіндіктер сапалы біліммен қатар саналы тәрбие алып, нұрлы болашаққа сара жол салып, елдің үкілеген үмітін ақтайтын болады.